Dizayn

         

            V qrupuna aid olan və xüsusi qabiliyyət tələb edən bu ixtisas üzrə mütəxəssis hazırlığı Azərbaycan Dövlət İqtisad Universitetində, Azərbaycan Dövlət Rəssamlıq Akademiyasında, Azərbaycan Memarlıq və İnşaat Universitetində, Azərbaycan Dövlət Mədəniyyət və İncəsənət Universitetində, Bakı Mühəndislik Universitetində, Qərbi Kaspi Universitetində, Odlar Yurdu Universitetində və Azərbaycan Texnologiya Universitetində aparılır.

            Dizaynın bütün fəaliyyət sahələrində özünəməxsus yeri var. Dizayn sözü ingiliscə layihələndirmək və həmin layihəni kağız üzərində təsvir etmək mənasını verir. Yaradıcılıq qabiliyyətləri ilə seçilən, yeni ideyalar irəli sürən və yeni fikirlər yaradan ixtisas sahibləri insanı əhatə edən aləmi daha gözəgəlimli və səmərəli etməyə çalışırlar.

Dizayn poliqrafiya, interyer, reklam və s. əşyanın və ya mühitin bədii layihələndirilməsi işlərini özündə ehtiva edir.

            İxtisasın sıx şəkildə bağlı olduğu sahələrdən biri də memarlıqdır. Memarlıq mühitinin dizaynı – binaların, tikililərin, obyektlərin dizayn baxımından formalaşdırılması deməkdir.

            Formalaşması baxımından tarixi çox qədim zamanlara gedib çıxan dizayn məqsədyönümlü olmasa da insanların yaşadığı bütün məkanlarda özünü göstərib.

            İxtisas üzrə təhsil alan tələbələr AutoCAD, ArchiCAD, 3DSMax və s. proqramları öyrənirlər.

            Bu ixtisas sahibləri verilən sifarişləri uyğun olaraq dizayn etmək, obyektlərin daxili və xarici dizaynını təşkil etmək, eskizlərin hazırlanması, mebel və interyer dizaynları və s. işlərlə məşğul olurlar.

            Web dizayner, memar-dizayner, interyer dizayneri, poliqraf dizayn və başqa bu kimi sahələrdə işləyə bilən ixtisas sahiblərinin rəssamlıq, yaradıcılıq, bədii-estetik zövqə, rəng duyumuna sahib olmaları lazımdır.

            Gələcəyi çox parlaq olan dizayn ixtisası üzrə yeni sahələrin yaranması qaçılmazdır. Dizayn üzrə mütəxəssislər şəhər mühitində reklam dizaynı, memarlıq mühitinin dizaynı, bağ-park quruculuğu dizaynı, habelə memarlıq və lahiyələndirmə üzrə dövlət və özəl müəssisələrində, peşəsi ilə əlaqəli olan digər dövlət və qeyri-dövlət müəssisələrində işləyə bilərlər.